منتدى قبيلة السمره من جهينة الرسمي - خـــــــــــــوة هل الطيب

الجيب والقرناس وخوة هل الطيب *** تسوى مجالسة الحضر فالمدينه
ماسبّهم واعرف انا مابهم عيب *** بس الهوى ياهل الهوى حـد لينـه
عزبه وخيمه والصحاري مضاريب *** والتيس من قبل الضحى صالخينه

مما راق لي

ومعلقينه من كراعه على الجيب *** والبـن الاشقـر تونـا حامسينـه
شبّت حطب ماهي بشبة عياسيب *** ارطـا وعرفـج يمنّـا حاطبينـه
واليا سنت شب الجروم اللواهيب *** قام المقهوي قّرب المـاء بدينـه
ركّب دلال مجلدات المقاظيب *** بغـداد مـن سـوق الحفـر جالبينـه
بيضن تلالا يطعمن المشاريب *** تبعد عـن انفـوس العبـاد الغبينـه
واليا احتمى ماهن يشيل المراكيب *** يحـط كيفـن بالنجـر طاحنينـه
فنجال ونص وردهن يمه قريب *** وجاب البريج وسكـره فـي بطينـه
وحطه على صفه هذيك المهاذيب *** والبن فاح وركـده فـي سكينـه
وجاب الدلال الي يعرف المواجيب *** ثنتين غير الـي بهـن عاملينـه
مجنون كيف ورتب الامر ترتيب *** حـط البهار وريـح هيلـه يازينـه
ثم زلهن لين استوى باخر السيـب *** وحطـه بنـاره ربنـا لاتهينـه
وقال اقدعوا تمر حلو توّه امجيب *** اخلاص من دار الحسا محظرينـه
ثم صب فنجاله ومابه عذاريب *** والله علـى الفنجـال تسلـم يمينـه
مجربن ماهـوب يحتـاج تجريـب *** اي والله انـا كلنـا مجربينـه
مافيه ضيف وكل ابونا معازيب *** والشـاي خـدر والـورق حاكرينـه
وعقب السوالف والقهاوي مطاليـب *** كـل يناظـر للمواتـر بعينـه
نبي نهيّف فوق روس المراقيب *** وانفّرع القرنـاس لاجـل السمينـه
اليا خطفها خطفتن بالمخاليب *** تبري النفـوس الضيقـات الحزينـه
واليا انتهى المقناص جبنا مكاسيب *** والحر الاشقر عقبها مبرقعينـه
ونمشي ونلقا يمّنا فطر شيب *** ومفرود يطرد مـن ورى امـه تنينـه
وسط النفود ولانمر الشخانيب *** نخاف من ضرب الحصـى فالمكينـه
ووساع صدر ونطقنا بالتراحيب *** واعقولنـا هـي العقـول الرزينـه
ياليت لي دورن بغوج الاطانيب *** وانسى حضارات الخـراب وسنينـه
اخير من طرد البنات الرعابيب *** واحدن تسمّع مـن عذابـه ونينـه
ممشاي صح وخوتي للاشانيب *** رجل يصد اعـن المراجـل ياشينـه